فيها حاجة حلوة.. ايوة بلدنا رغم كل السلبيات الفيها وفى ناسها فيها حاجة حلوة.. فيها طيبة قلب، فيها تضحية، فيها جدعنه، فيها الناس صابرة وبتستحمل ورغم الظروف الصعبة أقل حاجة بتضحكهم وتخفف عنهم ومهما حصل ما بيفقدوش إيمانهم بربنا وفيها شباب رغم كل المحبطات أحلامهم وطموحاتهم مالهاش حدود
هأكون واقعية هتكلم عن مواقف بسيطة مرت بيها وشوفتها بعينى.. لو جينا نتكلم عن طيبة القلب والتضحية هنلقى ان فى واحدة بتتنازل عن اللبس الجديد اللسه مشترياه لمجرد أنها سمعت واحده غالبانه بتقول أنها بردانه، هنلقى حد لما يكون معاه حاجة حلوة بيدى منها حتة لكل طفل صغير يقابله فى الشارع
انما بقى لو جينا للجدعنة لما شاب يكون تعبان فى الشغل طول النهار ويركب الأتوبيس لاء ويلقى كرسى يقعد عليه وتكون الفرحة مش سايعاه وبعدين يسبه لبنوتة جاية بعديه علشان ما تقفش وسط الرجالة او حتى لراجل عجوز جدعنه دى ولا مش جدعنه
لما تلقى السواق بيتخانق مع حد على الأجرة ويجى حد يقول يا جماعة ما تتخانقوش الأجرة عندى.. لما ولد يتحمق علشان واحد بيكلم بنت وحش كل دى مواقف تدل على ان بجد مصر لسه فيها حاجة حلوه
لو هنتكلم عن الصبر وقوة التحمل ممكن نتكلم للصبح انا مش هطول عليكم أنتم بس بصوا على أى رب أسرة شوفوه بيشتغل كام ساعة فى اليوم وكام شغلانة شوفوا بيروح بيته الساعة كام شوفوا أزاى بيجى على نفسه علشان يعيش ولاده أحسن عيشه شوفوا ازاى راضى بحاله وكل أمله أنه ولاده ما بدتبهدلوش زيه
اما بالنسبة لأحلام الشباب وطومحاتهم دى مالهاش نهاية زى ما فى ناس كتير فقدت الأمل فى شباب مايعرفش لليأس طريق بيجرب كل حاجة بيعلم نفسه ويطور قدراته ويعافر وكل وقعة والتانية بتقويه أكتر وتثبته شباب ولا بيخاف من الدنيا بحالها ولو عايز الشمس يطلها يمسك نجم السما بايده والدنيا إن مالت يعدلها شباب مش طمعان غير فى مستقبل أفضل وعايز يجيبه بأيده مش مستانى حد يجيبهوله لحد عنده وواثق ان ربنا مش هيضيع تعبه
بعد كل ده أكيد حسيتم زيي ان مصر بجد.. فيها حاجة حلوة
Live as if everything around you tells you "say cheeeeese"
Monday, March 4, 2013
بتضحك كام مرة فى اليوم؟ وبتضحك على ايه؟! جربت تحسبها؟! بتضحك على حاجة عجبتك ولا فقعتك، ولا حاجة أستغربت منها؟! بتضحك علشان تظهر فرحتك ولا تدارى دمعتك ولا علشان تتصدق على الحواليك؟ تتعدد الأسباب والأبتسامة خاالدة :))ا
